ఆఖరి బంతికి బుమ్రా సిక్స్.. కోహ్లీ ఫిదా

ఆస్ట్రేలియాతో మొహాలి వేదికగా ఈరోజు జరుగుతున్న నాలుగో వన్డేలో శిఖర్ ధావన్‌ మెరుపు సెంచరీ కంటే జస్‌ప్రీత్ బుమ్రా ఆఖరి బంతికి కొట్టిన సిక్స్ ఎక్కువగా అభిమానుల్ని ఆకర్షిస్తోంది. మ్యాచ్‌లో టాస్ గెలిచి తొలుత బ్యాటింగ్ చేసిన భారత్ జట్టు.. ఓపెనర్లు శిఖర్ ధావన్ (143: 115 బంతుల్లో 18x4, 3x6), రోహిత్ శర్మ (95: 92 బంతుల్లో 7x4, 2x6) చెలరేగడంతో నిర్ణీత 50 ఓవర్లలో 9 వికెట్ల నష్టానికి 358 పరుగులు చేసింది. అయితే.. ఆఖరి బంతికి క్రీజులోకి వచ్చిన జస్‌ప్రీత్ బుమ్రా (6 నాటౌట్: 1 బంతుల్లో 1x6) తాను ఎదుర్కొన్న తొలి బంతినే కళ్లుచెదిరే రీతిలో సిక్సర్‌గా మలిచాడు. కెరీర్‌లో ఇప్పటి వరకూ 48 వన్డేలాడిన బుమ్రాకి ఇదే తొలి సిక్స్ కావడం కొసమెరుపు..!

ఇన్నింగ్స్ ఆఖరి ఓవర్ వేసిన పాట్ కమిన్స్ బౌలింగ్‌లో తొలి బంతిని సిక్స్‌‌గా మలిచిన విజయ్ శంకర్ (26: 15 బంతుల్లో 1x4, 2x6) మూడో బంతికి ఔటయ్యాడు. ఆ తర్వాత వచ్చిన చాహల్ ఐదో బంతికి ఔటవగా.. చివరి వికెట్‌గా జస్‌ప్రీత్ బుమ్రా క్రీజులోకి వచ్చాడు. అప్పటికే ఐదు వికెట్లు పడగొట్టిన కమిన్స్.. బుమ్రాని ఔట్ చేస్తాడు లేదా కనీసం బంతిని డాట్ చేస్తాడని అంతా భావించారు. కానీ.. బుమ్రా అందరి అంచనాల్ని తలకిందులు చేశాడు. ఆఫ్ స్టంప్‌ లైన్‌పై పడిన బంతిని కళ్లుచెదిరే రీతిలో లాంగాన్ దిశగా సిక్స్‌గా మలిచాడు. బుమ్రా షాట్‌కి సంబరపడిన విరాట్ కోహ్లీ.. లేచి నిలబడి మరీ చప్పట్లు కొట్టాడు.
Loading...

Latest Hits(ఎక్కువ మంది చదివిన వార్తలు)