పెళ్లి ఇష్టంలేకపోతే చెప్పడానికి చాలా మార్గాలున్నాయి.. కానీ, పెళ్లైన వారానికే ఆ ఆడది ఇంతకు తెగిస్తుందా?


Loading...

చదివింది ఉన్నత చదువు.. ఫేస్‌బుక్‌లో పరిచయమైన యువకుడితో ప్రేమ.. కానీ, మేన బావతో పెళ్లి.. అది ఇష్టంలేకపోతే చెప్పడానికి ఎన్నో మార్గాలున్నాయి.. కానీ, ఆ నవవధువు అనూహ్య నిర్ణయం తీసుకుంది. పెళ్లైన 9 రోజులకే కట్టుకున్నవాణ్ని దారుణంగా హత్య చేయించింది. విజయనగరం జిల్లా గరుగుబిల్లి మండలం తోటపల్లి ఐటీడీఏ ఉద్యానవనం వద్ద సోమవారం (మే 7) రాత్రి నవదంపతులపై దాడి ఘటన కేసు మిస్టరీని పోలీసులు చేధించారు. ఇష్టం లేని పెళ్లి చేశారన్న కోపంలో మృతుడి భార్య సరస్వతే ఈ దారుణానికి ఒడిగట్టినట్టు తేల్చారు. కేసు వివరాలను విజయనగరం ఎస్పీ పాలరాజు మీడియాకు వెల్లడించారు. బీఎస్సీ కంప్యూటర్స్ చేసిన సరస్వతికి ఫేస్‌బుక్ ద్వారా శివ అనే యువకుడు పరిచయం అయ్యాడు. అనతికాలంలోనే ఆ పరిచయం ప్రేమగా మారింది. కానీ, సరస్వతి తల్లిదండ్రులు ఆమె మేన బావ శంకర్రావుతో ఆమెకు పెళ్లి నిశ్చయం చేశారు. వారిద్దరికీ వివాహం చేయాలని చిన్ననాటి నుంచే భావించారు. అయితే.. శివతో ప్రేమ వ్యవహారం నడుపుతున్న సరస్వతికి ఈ పెళ్లి ఏమాత్రం ఇష్టం లేదు. పెళ్లి ఇష్టంలేదని చెప్పడానికి ఎన్నో మార్గాలున్నాయి. కానీ, సరస్వతి అవేమీ చేయలేదు. తన బావ శంకర్రావుతో మౌనంగా తాళి కట్టించుకుంది. ఏప్రిల్ 28న పెద్దలు వారి వివాహాన్ని వైభవంగా జరిపించారు. ప్రియుడు శివతో రోజూ కాంటాక్టులో ఉన్న సరస్వతి పెళ్లి విషయం చెప్పింది. ఎలాగైనా భర్త అడ్డుతొలగించుకొని అతడితో జీవితం పంచుకోవాలనే ఆశవెలిబుచ్చింది.
Loading...

ఇంకేం.. ఇద్దరూ కలిసి శంకర్రావు హత్యకు కుట్ర పన్నారు. సాధారణంగా హత్య చేస్తే తప్పించుకోలేం అని తెలుసు. దీంతో దొంగతనం నాటకానికి తెర తీశారు. ‘దోపిడీ దొంగలు మాపై దాడి చేసి నగలు దోచుకెళ్లారు. అడ్డుకోవడానికి ప్రయత్నించిన నా భర్తను కిరాతకంగా హత్య చేశారు’.. ఇదీ సరస్వతి రాసుకున్న స్క్రిప్ట్.. దీన్ని శివ ఆచరణలో పెట్టాడు. విశాఖపట్నానికి చెందిన గోపీ అనే వ్యక్తికి ఫోన్ చేసి తన ప్రణాళిక చెప్పాడు. గోపీ అతడికి మురళీ కృష్ణ అనే నేరచరిత్ర ఉన్న వ్యక్తిని పరిచయం చేశాడు. అప్పటికే 4 హత్య కేసులతో పాటు పలు కేసుల్లో నిందితుడిగా ఉన్న చరిత్ర మురళికి ఉంది. శంకర్రావు హత్యకు డీల్ కుదుర్చుకున్న మురళికి ‘తేజ్’ యాప్ ద్వారా సరస్వతి ఒకసారి రూ. 3000, మరోసారి రూ. 4000 పంపించింది. దీంతో నమ్మకం కుదిరిన మురళి రంగంలోకి దిగాడు. వైజాగ్‌కు చెందిన ఆటో డ్రైవర్ కిశోర్‌తో రూ. 1500కు ఒప్పందం కుదుర్చుకున్న మురళి తన బృందంతో పార్వతీపురం బయలుదేరాడు. డీజిల్ పోయించడంతో పాటు, మద్యం తాగిస్తానని కూడా కిశోర్‌కు ఆశజూపారు. ఇదే సమయంలో ముందస్తు ప్లాన్ ప్రకారం సర్వస్వతి తన భర్తను తీసుకొని పార్వతీపురం బయలుదేరింది. అక్కడ తన బైక్‌ను సర్వీసింగ్ కోసం ఇచ్చిన శంకర్రావు, షాపింగ్ తదితరాలు పూర్తి చేసుకున్నాడు. ఇదే సమయంలో సరస్వతి తమ ఫొటోలను నిందితులకు వాట్సాప్ చేసింది. తాము ఎక్కడున్నామనే వివరాలను చెప్పింది. ఆ తర్వాత సర్వీసింగ్ పూర్తైన బైక్ తీసుకొని శంకర్రావు తన భార్యతో కలిసి ఇంటికి తిరుగు పయనమయ్యాడు. మార్గమధ్యంలో మల విసర్జన చేయాల్సి ఉందంటూ సరస్వతి బైక్‌ను ఆపించింది.
Loading...

అదే స్పాట్‌లో మురళి గ్యాంగ్ వచ్చి శంకర్రావును హత్య చేయాలనేది ప్లాన్. కానీ, అక్కడ వెలుతురు ఎక్కువగా ఉండటం, వాహనాలు వస్తూ, పోతుండటంతో వర్కవుట్ కాలేదు. ఆ తర్వాత సరిగ్గా తోటపల్లి ఐటీడీఏ ఉద్యానవనం సమీపానికి చేరుకున్న సమయంలో సరస్వతి మరోసారి అదే కారణంతో బైక్ ఆపించింది. సరస్వతి పొదల్లోకి వెళ్లగా.. రోడ్డు మీద వేచి చూస్తున్న శంకర్రావును మురళి ఇనుప రాడ్‌తో తలపై వెనక నుంచి బలంగా కొట్టాడు. ఒకే ఒక దెబ్బతో అతడు అక్కడికక్కడే కుప్పకూలిపోయాడు. ఇదే సమయంలో పొదల్లో ఉన్న సరస్వతి తన గాజులు పగలగొట్టుకొని, నగలను దాచిపెట్టి దొంగతనం డ్రామా ఆడింది. పోలీసులను తప్పుదోవ పట్టించి చివరికి అడ్డంగా దొరికిపోయింది.

Popular Posts

Latest Posts