కట్టుకున్న భర్తకు తీరని ద్రోహం చేసి అతడి స్నేహితుడితో వివాహేతర సంబంధం పెట్టుకొని చివరికి దారుణంగా హత్యకు గురైంది

తన కుమార్తె తప్పుడు పనులు చేసిందని, తప్పుడు పనులు చేస్తే జీవితాలు ఇలాగే అర్ధాంతరంగా ముగిసిపోతాయని సౌమ్య తండ్రి పున్నారావు నిర్వేదం వ్యక్తం చేశారు. ఏడాదిన్నర వయసున్న తన మనవడు దిక్కులేనివాడయ్యాడని ఆయన కంటతడి పెట్టారు. కట్టుకున్న భర్తకు తీరని ద్రోహం చేసి అతడి స్నేహితుడితో వివాహేతర సంబంధం పెట్టుకొని సౌమ్య అనే మహిళ చివరికి దారుణంగా హత్యకు గురైన విషయం తెలిసిందే. ఈ హత్య కేసులో ఆమె ప్రియుడు ప్రకాశ్‌ను పోలీసులు అరెస్ట్ చేశారు. డబ్బు ఇవ్వనందుకే సౌమ్యని బ్లాక్ మెయిల్ చేసి, చంపేసినట్టు అతడు పోలీసుల విచారణలో అంగీకరించాడు. శనివారం ఎస్సార్‌నగర్ పోలీస్‌స్టేషన్‌లో ఏర్పాటు చేసిన విలేకరుల సమావేశంలో వెస్ట్‌జోన్ డీసీపీ ఏఆర్ శ్రీనివాస్ కేసు వివరాలు వెల్లడించారు.

అనంతపురం జిల్లాకు చెందిన పత్తిపాటి ప్రకాశ్ 2010లో నిజామాబాద్ జిల్లా డిచ్‌పల్లిలో నవయుగ కన్‌స్ట్రక్షన్స్‌లో పనిచేసేటప్పుడు.. అక్కడ విశాఖపట్నానికి చెందిన నాగభూషణంతో పరిచయం ఏర్పడింది. 2012లో వారిద్దరూ కొంత కాలం అస్సాంలో కలిసి పనిచేశారు. అనతికాలంలోనే నాగభూషణానికి ప్రకాశ్ ఫ్యామిలీ ఫ్రెండయ్యాడు. అదే ఏడాది ఆగస్టులో నాగభూషణానికి సౌమ్యతో పెళ్లి జరిగింది. నాటి నుంచి ప్రకాశ్ ఆ కుటుంబంతో సాన్నిహిత్యం పెంచుకొని తరచూ ఇంటికి వస్తుండేవాడు. ఆ పరిచయం కాస్త సౌమ్యతో వివాహేతర సంబంధానికి దారితీసింది.

నాగభషణంకు 2016లో హైదరాబాద్ ఎల్‌అండ్‌టీ మెట్రోలో సివిల్ ఇంజినీర్‌గా ఉద్యోగం రావడంతో కుటుంబంతో ఎర్రగడ్డ నందానగర్‌లోని సూరజ్ ఆర్కేడ్‌లో నివాసం ఉంటున్నాడు. ప్రకాశ్ అస్సాంలోని ఉద్యోగాన్ని వదులుకొని అనంతపురానికి వెళ్లిపోయాడు. అక్కడ ఫైనాన్స్‌లో రూ.13 లక్షలతో ఓ స్కార్పియోను కొనుగోలు చేశాడు. కానీ, మూడు నెలల నుంచి ఈఎంఐల బకాయిలు చెల్లించలేకపోయాడు.

ప్రకాశ్ తనకు డబ్బు అవసరమైనప్పుడల్లా సౌమ్యకు ఫోన్ చేసి తీసుకెళ్లేవాడు. ఇదే క్రమంలో ఈఎంఐల విషయం చెప్పి సౌమ్యను డబ్బు అడిగాడు. డబ్బిస్తానని చెప్పిన సౌమ్య ఈసారి పెద్ద మొత్త అడగటంతో కాస్త జాప్యం చేసింది. ఈ క్రమంలో ప్రకాశ్.. మార్చి 31 నుంచి ఏప్రిల్ 2 వరకు వరసగా 3 రోజుల పాటు ప్రకాశ్ తన మిత్రుడు నాగభూషణం ఇంటికి వచ్చాడు. నాగభూషణం, సౌమ్య, ప్రకాష్.. ముగ్గురు కలిసి ఇంట్లోనే మద్యం సేవించారు. ఏప్రిల్ 2న రాత్రి వారంతా కలిసి మందు తాగిన తర్వాత 8 గంటలకు నాగభూషణం డ్యూటీకి వెళ్లిపోగా ప్రకాశ్ అక్కడ నుంచి వెళ్లిపోయాడు. రాత్రి 9 గంటలకు ప్రకాశ్ మళ్లీ తిరిగి రాగా.. సౌమ్య, ప్రకాశ్ శారీరకంగా కలుసుకున్నారు. ఆ తర్వాత స్కార్పియో ఫైనాన్స్ మూడు నెలల ఈఎంఐల డబ్బు రూ.60 వేలు కావాలని ప్రకాశ్ ఒత్తిడి చేశాడు.

తన వద్ద డబ్బు లేదని సౌమ్య బదులివ్వగా, మెడలోని బంగారు చైన్ ఇవ్వాలని ప్రకాశ్ పట్టుబట్టాడు. అందుకు ఆమె నిరాకరించడంతో వివాహేతర సంబంధం గురించి నీ భర్తకు ఇప్పుడే చెప్తా అంటూ సౌమ్య ఫోన్‌ను లాక్కోబోయాడు. దాంతో సౌమ్య తన సెల్ ఫోన్‌ను స్విచ్చాఫ్ చేసింది. ప్రకాశ్ ఆవేశంతో అక్కడే ఉన్న డంబుల్‌ తీసుకొని సౌమ్య తలపై బలంగా కొట్టాడు. కొనఊపిరితో కొట్టుమిట్టాడుతున్న ఆమెను బ్లేడ్‌తో గొంతుకోశాడు. మెడలోని నాలుగు తులాల బంగారు గొలుసును లాక్కున్నాడు. పూజగదిలోని నువ్వుల నూనెను ఆమెపై పోసి ఆపై టవల్, చున్నీ పడేసి నిప్పంటించాడు. సౌమ్య సెల్ ఫోన్‌ను బాత్రూంలోని ఫ్లష్‌ట్యాంకులో పడేశాడు. నేరం తనపైకి రాకుండా, అగ్ని ప్రమాదంగా చిత్రీకరించేందుకు ఇంట్లోని గ్యాస్‌ను వదిలి, తలుపునకు గడియపెట్టి పారిపోయాడు.

ప్రకాశ్ తన ఇంటికి వచ్చిన విషయం నాగభూషణం పోలీసులతో చెప్పకపోవడంతో కేసు విచారణ జఠిలమైంది. ఆ విషయం చెబితే సౌమ్య మద్యం తాగిన విషయం బయటపడుతుందని ఆయన ఆందోళన చెందాడు. అయితే బంధువులు చెప్పిన వివరాల ఆధారంగా.. ప్రకాశ్‌ను అనుమానించిన పోలీసులు అతనిడి పట్టుకునేందుకు డికెక్టివ్ డీఎస్సై శ్రీనివాస్ ఆధ్వర్యంలోని బృందం ఏపీలోని అనంతపురానికి వెళ్లింది. పోలీసులను చూసిన ప్రకాశ్ స్కార్పియోలో పారిపోతుండగా, డీఎస్సై శ్రీనివాస్ వెంబడించి పట్టుకున్నారు. హత్యకు గురైన సౌమ్య నుంచి దోచుకున్న గొలుసును అనంతపురంలోని శ్రీరాం ఫైనాన్స్‌లో తాకట్టు పెట్టి రూ.60 వేలు బాకీ తీర్చాడు. మిగిలిన రూ.22 వేలను నిందితుడి నుంచి రికవరీ చేసి, వాహనాన్ని సీజ్ చేశారు.

సౌమ్యను హత్య చేసేందుకు పథకం పన్నిన ప్రకాశ్.. తన సెల్ ఫోన్లను హైదర్‌నగర్‌లోని తన మిత్రుడు సుభాష్ ఇంటి వద్దే స్విచ్చాఫ్ చేసి వచ్చి ఈ దారుణానికి ఒడిగట్టాడు. సెల్ ఫోన్ సిగ్నల్స్‌తో దొరికిపోయే అవకాశం ఉంటుందని భావించిన ప్రకాశ్ ఈ పథకం వేశాడు. హత్యాస్థలంలో సరైన ఆధారాలు లభించకపోయినా, కేసును సవాలుగా తీసుకొని ఛేదించామని డీసీపీ తెలిపారు. ప్రకాశ్ ఫోన్ నంబర్‌ను సీడీఆర్‌లో కాల్ డిటైల్స్ పరిశీలించగా.. అతనికి నేర చరిత్ర ఉన్నట్టు తేలింది. 2007లో అనంతపురంలో ఓ దోపిడీ కేసులో రెండు నెలలకుపైగా జైలుకు వెళ్లినట్లు తేలింది. ప్రకాశ్ తనకు మంచి మిత్రుడని, ఇంతటి దారుణానికి ఒడిగడతాడని అనుకోలేదని నాగభూషణం ఆవేదన వ్యక్తం చేశారు. అతడో దోపిడీ దొంగ అని తెలియక ఇన్నాళ్లూ స్నేహం చేశానని కంటతడి పెట్టారు.

Popular Posts

Latest Posts