నిజంగా సాహసయాత్రే సముద్రం ఆటుపోటులు చూసుకుని బస్సుల్లో, జీపుల్లో చేరుకోవాలి కానీ జీవితంలో మరిచిపోలేని అద్భుతం

సముద్రంలో బస్సు ప్రయాణం... వినేందుకు ఆశ్చర్యంగానే ఉన్నా, నమ్మక తప్పదు. ఎందుకంటే.. దేశంలోని చిట్టచివరి ప్రాంతమైన దనుష్కోడికి చేరాలంటే 2016 వరకు సముద్రంలోనే ప్రయాణం చేయాల్సి వచ్చేది. పర్యటకులు, జాలర్లు సముద్రం ఆటుపోటులు చూసుకుని ఆ ప్రాంతానికి బస్సుల్లో, జీపుల్లో చేరుకునేవారు. తమిళనాడులోని రామేశ్వరానికి దాదాపు 19 కిమీల దూరంలో ఉన్న ధనుష్కోడికి ప్రయాణమంటే.. నిజంగా సాహసయాత్రే. శ్రీలంకను కలిపే రామ సేతు లేదా ఆడామ్స్ బ్రిడ్జ్‌‌ను చూడాలంటే తప్పకుండా ఈ పంబన్ దీవుల్లోని ధనుష్కోడికి వెళ్లాల్సిందే. ఒకప్పుడు ఇక్కడికి రావాలంటే సముద్రం నీటి మధ్యలో ఇసుక తిన్నెలపై బస్సులు లేదా జీపుల్లో చేరుకోవల్సి వచ్చేది. ప్రభుత్వం ఇటీవల ఈ మార్గంలో రోడ్డు సదుపాయం కల్పించడంతో ప్రయాణం సులభమైంది.
దేశ చరిత్ర, ఇతిహాసాల్లో ధనుష్కోడికి ప్రత్యేక స్థానం ఉంది. అయితే, ప్రకృతి విపత్తుల వల్ల ఈ ప్రాంతం మనుషులు నివసించడానికి వీలులేని ప్రాంతంగా మిగిలిపోయింది. 1964లో రామేశ్వరం వద్ద తీరం దాటిన తుపాను.. 23 అడుగుల ఎత్తైన రాకసి అలలతో ధనుష్కోడిని మింగేసింది. ఈ విపత్తులో1800 మంది చనిపోయినట్లు అధికారిక లెక్క. తుపాను సమయంలో 115 మంది ప్రయాణికులతో వెళ్తున్న రైలు సైతం ఉప్పెనలో కొట్టుకుపోయింది. అప్పటి విషాద గుర్తులు ఇప్పటికీ దనుష్కోడిలో కనిపిస్తూనే ఉంటాయి. అప్పటి చర్చ్, పోలీస్ స్టేషన్, రైల్వే స్టేషన్ల మొండి గోడలు అప్పటి విషాదాన్ని గుర్తు చేస్తుంటాయి. ప్రస్తుతం ఇక్కడ జాలర్లు మాత్రమే నివసిస్తున్నారు. 2004లో ఏర్పడిన సునామీ సైతం 1,600 అడుగుల ఎత్తైన అలలతో దనుష్కోడిని ముంచేశాయి. బస్సులు సముద్రం నీటిలో ఎలా ప్రయాణించేవో ఈ వీడియోలో చూడండి.

రామేశ్వరానికి రైలు లేదా బస్సులో చేరుకోవచ్చు. లేదా మధురైలో విమానం దిగి రామేశ్వరం మీదుగా దనుష్కోడికి వెళ్లేందుకు ట్యాక్సీ సర్వీసులు అందుబాటులో ఉంటాయి. రాత్రి వేళ్లలో ఈ ప్రాంతాన్ని సందర్శించడం ప్రమాదకరం. వర్షాకాలం, తుపాన్ల సమయంలో ఈ ప్రాంతానికి వెళ్లకపోవడం మంచిది.

Popular Posts

Latest Posts