ఓ మహిళ తన చావుబతుకుల మధ్య కొట్టుమిట్టాడుతూ సహాయం కోసం అభ్యర్థిస్తోంటే, ఇంత నీచంగా ప్రవర్తించాలని వాడికి ఎలా అనిపించింది ?

తొక్కిసలాటలో తీవ్రంగా గాయపడిన ఓ మహిళ ప్రాణాలు కోల్పోతూ రక్షించండి.. రక్షించండి అని సహాయం కోసం అర్థిస్తోంటే, ఆమెని రక్షించడానికి బదులు అంత దయనీయమైన దుస్థితిలోనూ ఆమె అందాన్ని ఆస్వాదిస్తూ ఆమెని వేధించాడు ఓ దుర్మార్గుడు. తొక్కిసలాట కారణంగా జనం తనపై పడటంతో పైకి లేవలేని దుస్థితిలో, నిస్సత్తువగా ప్రాణాన్ని కాపాడుకోవడం కోసం ఆ బాధితురాలు చావు అంచుల్లో ఆపన్నహస్తం కోసం వేచిచూస్తున్న ఆఖరి క్షణాలు అవి. కానీ అంతటి ధీన స్థితిలోనూ ఆమెని రక్షించి ప్రాణం నిలబెట్టాల్సిన అత్యవసరం సమయంలో ఆమెని వేధిస్తూ నిలబడ్డాడు ఓ కామాంధుడు. శుక్రవారం మధ్యాహ్నం ముంబైలోని ఎల్ఫిన్‌స్టోన్ రైల్వే స్టేషన్‌లో ఫుట్ ఓవర్ బ్రిడ్జిపై జరిగిన తొక్కిసలాటకు సంబంధించి ఆలస్యంగా వెలుగుచూసిన ఓ వీడియో ఫుటేజ్‌లో ఆ కామాంధుడి చేష్టలు చూసి జనం అసహ్యించుకుంటున్నారు. ఆ మహిళ చనిపోవడానికి కొన్ని క్షణాల ముందు కూడా ఆమెని వేధించిన ఆ కామాంధుడిపై చర్యలు తీసుకోవాలని నెటిజెన్స్ డిమాండ్ చేస్తున్నారు.

ది హిందూ ప్రచురించిన ఓ కథనం ప్రకారం.. తొక్కిసలాట చోటుచేసుకున్న సమయంలో కొంతమంది మహిళలని ఆదుకున్నట్టుగా నటిస్తూ వారి పర్సులు, ఆభరణాలు చోరీ చేశారని ఆవేదన వ్యక్తచేశారు జయ్‌శ్రీ కనడే. తొక్కిసలాట జరిగినప్పుడు పరెల్ స్టేషన్‌లో వున్న జయ్‌శ్రీ కనడే ఈ వీడియో గురించి మాట్లాడుతూ.. '' ఓ మహిళ తన చావుబతుకుల మధ్య కొట్టుమిట్టాడుతూ సహాయం కోసం అభ్యర్థిస్తోంటే, ఇంత నీచంగా ప్రవర్తించాలని వాడికి ఎలా అనిపించింది ? చావు బతుకుల మధ్య కొట్టుమిట్టాడుతున్న మహిళని ఓ వ్యక్తి వేధించడం సిగ్గుచేటు. ఆమెని వేధించిన వ్యక్తిపై చట్టరీత్యా చర్యలు తీసుకోవాలి" అని కోరారు.

ఎల్ఫిన్‌స్టోన్ రోడ్ నివాసి అయిన సందేశ్ బహదూర్ మాట్లాడుతూ.. '' ఆ వీడియో చూడకుండానే అదొక సిగ్గుమాలిన చర్య' అని అర్థమైపోతోంది. చావుబతుకుల మధ్య కొట్టుమిట్టాడుతున్న ఓ బాధితురాలిని వేధించాలి అనే ఆలోచన వచ్చిన ఆ దుర్మార్గుడిని విడిచిపెట్టొద్దు. ఘటన జరిగిన వెంటనే తాము అక్కడికి చేరుకుని క్షతగాత్రులకి సహాయం అందించే ప్రయత్నం చేశాం. కానీ అప్పటికే వాళ్లంతా ఒకరిపై మరొకరు పడి వుండటంతో చాలామందిని రక్షించలేకపోయాం" అని ఆవేదన వ్యక్తంచేశారు. వేధింపుల పర్వాన్ని వెలుగులోకి తీసుకవచ్చిన వీడియో గురించి తెలుసుకున్న గవర్నమెంట్ రైల్వే పోలీసు కమిషనర్ నికేత్ కౌశిక్ మీడియాతో మాట్లాడుతూ.. ఈ ఘటన ముంబై పోలీసుల పరిధిలోకి వస్తుందని అన్నారు. అయితే, దీనిపై తాను కూడా విచారణకు ఆదేశిస్తానని కాశిక్ మీడియాకు తెలిపారు.

Popular Posts

Latest Posts